Kwa nini tunasifu kama sehemu ya maombi yetu?

 

Sifa huja kutokana na moyo wa shukrani au furaha, pia unaweza ukaimba katika hali ya huzuni ukitoa hisia zako za ndani kutokana na kile unachopitia.

Kuimba na kusifu ni vya muhimu kwa mafanikio ya ufahamu na mahusiano yako na Mungu, kabla haujaomba lazima ujiulize maswali kuwa je mahusiano yako yakoje na yule unayetaka kumuomba.

Utimilifu wa kweli wa kiroho huja pale tunapoelekeza maisha yetu katika muendelezo wa kusifu na kuabudu, unapoendelea kumsifu na kumwabudu Mungu ndipo unaongeza ladha ya mahusiano yako ya kiroho na Mungu wako.

 

Chanzo cha sifa zetu:

Yesu ndio chanzo cha sifa zetu kwa sababu ya kile alichotutendea, alikufa msalabani kwa ajili yetu ili alipe deni zetu, alifufuka kutoka kaburini ili nasi tupate kuwa hai na sasa tuna fursa na uwezo wa kupokea miujiza mikuu ya Mungu kwa sababu ya kile alichofanya. Tunasifu na kuabudu kuheshimu na kushukuru kile Yesu alichokifanya kwa ajili yetu.

Kuzaliwa upya kwa roho ya Mwanadamu kulikuja kupitia kile Yesu alichokifanya; Neno la Imani li karibu sana nasi liko kinywani na moyoni mwetu. Warumi 10:8 “Lakini yanenaje? Lile neno li karibu nawe, katika kinywa chako, na katika moyo wako; yaani, ni lile neno la imani tulihubirilo.”

 

Sifa hazitoki kwenye kitabu, kinanda wala gitaa bali huanza toka ndani ya roho ya mtu na inatawaliwa na nia ya mwanadamu. Kwa nini nia? Kwa sababu akili ya mtu ndiyo inayoamua kuwa anataka kuimba, na wimbo gani ataimba.

Nguvu ya sifa:

Matendo ya Mitume 16:25-26 “Lakini panapo usiku wa manane Paulo na Sila walikuwa wakimwomba Mungu na kumwimbia nyimbo za kumsifu, na wafungwa wengine walikuwa wakiwasikiliza. Ghafula pakawa tetemeko kuu la nchi, hata misingi ya gereza ikatikisika, na mara hiyo milango ikafunguka, vifungo vya wote vikalegezwa.” Wakati Paulo na Sila walipo amua kumsifu Mungu walifungua malango yao ili waweze kumsababisha mfalme wa Utukufu kuja na kutenda kwa niaba yao.

Utakapojua jinsi ya kumpa Mungu sifa utasababisha mambo yatokee kwako. Tunapo sema kusifu hapa sina maana ya kuimba na waimbaji, kinanda wala gitaa bali nazungumzia moyo wa mtu ulio na sifa.

Sifa sio kwa watu wanaosahau nini kilitokea kwao, la! Kusifu na kuabudu ni kwa wale walio na moyo wa shukrani.

 

Nguvu ya sifa iliwasababisha Paulo na Sila kutoka gerezani, yeyote aliye na nguvu ya sifa haijalishi kutakuwa na vikwazo vya aina gani kutoka kwa ibilisi kamwe havitamzuilia yeye kushindwa kumsifu Mungu, kwa jinsi yoyote atamsifu Mungu kwa kile alichomtendea.

Tutakapo ziruhusu zaburi za sifa katika mioyo yetu Mungu atalitimiza Neno lake kwetu na tutaona ushindi katika maisha yetu.

 

Kuabudu inamaana gani?

Kuabudu maana yake ni kustahili au uthamani, kuhesabiwa wa thamani hiki ndicho tunakiita kuabudu. Unapo muabudu Mungu inamaana kuwa unamwambia unastahili, wewe ni wa thamani kwangu.

Unamsifu Mungu kwa ajili ya kile alicho kifanya na unamwabudu kwa maana anastahili na Yeye ni wa thamani kwako.

Kusifu kunaambatana na matoleo ya kidhabihu, kuna tofauti kati ya sadaka na dhabihu, sadaka unatoa kitu cha thamani lakini dhabihu inaambatana na moyo.

1 Mambo ya Nyakati 16:29 “Mpeni Bwana utukufu wa jina lake; Leteni sadaka, mje mbele zake; Mwabuduni Bwana kwa uzuri wa utakatifu;”

 

Waefeso 6:12 “Kwa maana kushindana kwetu sisi si juu ya damu na nyama; bali ni juu ya falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho.” Kushindana kwetu, kupigana, kupambana si kati yangu mimi na wewe, kama tukishinda na kupigana inamaana mmoja ni wa ibilisi na mwingine ni wa Mungu.

Katika familia yoyote ile ukiona kuna talaka maana yake mtu mmoja kati yao amekubali kutumiwa na ibilisi ili apate kutenda hicho alicho kifanya. Kama ni kanisani ukaona utengano watu wanaligawanya kanisa kwa maneno yao na mtu anasema MUNGU ameniambia nifanye hivi, la si Mungu ni ibilisi, kwa sababu Mungu msistizo wake ni umoja na sio mgawanyo. Ukionamgawanyo basi jua kuwa ni ibilisi yupo kazini.

 

Mungu aliumba mfanano wala yeye hakuleta mgawanyo mbinguni au duniani. Hata sasa unaona kuna makabila mengi na mataifa mengi Mungu hakuumba hayo bali ni ibilisi.

Ndio maana siku za mwisho wote waliomwamini Mungu tutakuwa mahali pamoja Mungu mmoja Roho Mtakatifu mmoja na Yesu mmoja. Kwa nini kuna haya yote ulimwenguni? Kwa sababu watu wamebeba maisha yao wenyewe hivyo wana shauku au tama ya kile wanacho kitaka na sio kile Mungu anachotaka.

Usikubali kutumiwa na ibilisi kwa kuwa mmoja wa kuleta ugomvi au utengano mahali popote bali uwe mpatanishi pamoja na Mungu.

 

Kuwekwa watu huru ni jambo moja na kuwasababisha waendelee kuwa huru ni jambo lingine, ni muhimu mno kumfundisha mtu adumu kuwa huru pindi anapo funguliwa au kuwekwa huru.

Unadumuje katika kuwa huru? Kaa mbali na dhambi, jifunze kuhusu Neno na maombi. Yohana 5:14 “Baada ya hayo Yesu akamkuta ndani ya hekalu, akamwambia, Angalia, umekuwa mzima; usitende dhambi tena, lisije likakupata jambo lililo baya zaidi.”

Watu wengi wanapokea uponyaji na baada ya huo ukombozi wanadumu nao kwa kitambo tu baada ya hapo maradhi yanarejea tena, je ni nani anayeyarejesha hayo maradhi? Ni mtu mwenyewe. Unapowekwa huru usirejee kule ulikokuwa mwanzo yaani usitende dhambi tena ili uweze kutunza huo uponyaji wako.

 

Ibilisi ana mambo matatu anayoyafanya kwa mtu, hasa kwa mwamini:

1.      Anakuja ili kukuibia, kuiba nini? Chochote kilicho chema ibilisi anataka akichukue kutoka kwako, anaweza kuchukua afya, pesa, mumeo, kazi yako au biashara yako, ibilisi ni mwizi.

2.      Kuua; ibilisi haji kuiba tu kwako bali pia anakuja kuua, chochote kizuri atakacho kiona atakiua, biashara yako, kazi yako au mahusiano yako. Ukiona kitu chochote katika maisha yako kinaelekea kufa usisubiri mpaka kife pambana.

3.      Anakuja kuharibu, ibilisia anapokuja kwa mtu ni ili kuharibu kitu kizuri kilichopo ndani ya mtu ili kukiondolea uzuri wake.

 

Biashara iliyoibiwa lazima irejeshwe, maisha bora ambayo ibilisi alikuibia lazima yarejee, furaha ambayo ibilisi alikuibia lazima irejeshwe kwa Jina la Yesu, lazima hayo yakatokee kwako jiadae.